Kampionia e Kosovës në basketboll te meshkujt, Trepça, të mërkurën do ta mësoj kundërshtarin që do të përballet në kualifikimet e Ligës së Kampionëve.
Shorti do të jetë të mërkurën kurse Trepça është në vazon e dytë.
“Liga e Kampionëve të Basketbollit po hyn në edicionin e saj të 10-të, duke filluar me shortin e Turneve të Raundit të Kualifikimit dhe edicionit të rregullt të mërkurën”, ka bërë të ditur Federata e Basketbollit të Kosovës (FBK).
Të tre turnetë e raundit kualifikues do të luhen në format eliminues me një ndeshje të vetme, duke filluar nga çerekfinalet. Ekipet nga Vazo 1 do të përballen me ekipet nga Vazo 4, ndërsa ekipet në Vazo 2 do të përballen me ekipet nga Vazo 3.
“Njëzet e katër (24) ekipe do të garojnë në tre (3) turne të Raundit Kualifikues. Të tre turnetë e Raundit Kualifikues do të zhvillohen në fund të shtatorit. Orari i detajuar i ndeshjeve, si dhe vendi i zhvillimit, do të shpallen më vonë në korrik”, ka shkruar FBK-ja.
Tre fituesit e turnut të raundit kualiikues do të avancojnë në grupet e edicionit të rregullt të Ligës së Kampionëve, i cili do të ketë tetë grupe me nga katër ekipe.
Trepça sezonin e shkuar ishte pjesë e kualifikimeve të Championsit por nuk arriti të siguroj kalimin në fazën e grupeve, për të vazhduar pastaj me garat në FIBA Europe Cup.
