Fundorët Kahlon Whitley e Mathew Lang, si dhe qendra Davante Cooper, më nuk janë pjesë e skuadrës së Istogut.
Ekipi i Superligës së Kosovës në basketboll, të hënën ka njoftuar se ka ndarë rrugët me amerikanët, me të cilët ka shkëputur kontratat me marrëveshje të dyanshme.
Largimi i tre lojtarëve të huaj te Istogu, ka ardhur një ditë pas humbjes së thellë që e pësuan nga Sigal Prishtina në kuadër të xhiros së 11-të të elitës së basketbollit kosovar.
Për Istogun, ekip që po debuton këtë edicion në Superligë, kjo ishte humbja e dhjetë karshi një fitoreje duke bërë që të renditet i fundit në tabelë me 12 pikë të mbledhura.
Në njoftimin e Istogut thuhet se pas të këtyre amerikanëve, klubi tashmë ka arritur marrëveshje me dy të huaj të tjerë, të cilët do ti prezantoj së shpejti.
Lang në 11 ndeshje për Istogun ka pasur një mesatare prej 13 pikëve, ndërsa Whitley ka realizuar nga 11 pikë në shtatë ndeshje të luajtura.
Ndërkohë, Cooper ka regjistruar vetëm pesë paraqitje dhe ka luajtur me një mesatare prej tri pikëve e dy kërcimeve.
