KB Bora është skuadra e parë që ka nisur përgatitjet për sezonin e ri në Superligën e Kosovës në basketboll, që nis muajin e ardhshëm.
Në krye me trajnerin Lubomir Minchev, Bora po bëhet gati në të gjitha aspektet kurse të dielën mbrëma ka konfirmuar edhe miqësoret që do ti luajë.
Ekipi nga Prishtina do të ketë përballje me kundërshtarë të fortë nga rajoni.
Miqësoren e parë, Bora do ta luajë kundër ekipit nga Bullgaria, Rilski Sportiv që do të zhvillohet më datën 30 gusht.
Më datën 6 shtator, Bora do të përballet me MZT Skopjen e Maqedonisë së Veriut, ndërsa më datat 9-10 shtator, ekipi i Superligës do të jetë pjesë e turneut “Bobi Petrovski 2025”.
Krahas Borës, në këtë turne do të marrin pjesë edhe Rabotniçki e Kozhuvi nga Maqedonia e Veriut, si dhe Pinar Karshiyaka e Turqisë.
