Nënkampioni i Kosovës në basketboll, Bashkimi, është gati për debutim në Evropë.
Sot, prej orës 19:00, në palestrën “Sezai Surroi” në Prizren, Bashkimi përballet me ekipin e madh nga Polonia, Anwil Wloclawek.
Kjo është ndeshja e parë e raundit kualifikues për FIBA Europe Cup, ndërsa ajo e kthimit zhvillohet më datën 1 tetor në Poloni.
Skuadra më e suksesshme nga këto përballje, avancon në fazën grupore të FIBA Europe Cup, ndërsa humbësi mbyllë aventurën evropiane.
Te Bashkimi, janë përgatitur maksimalisht për sfidën e parë në Prizren dhe me ndihmën e publikut synon ta befasoj Anwilin, ekip që vlerësohet favorit duke pasur parasysh se në vitin 2023 triumfoi pikërisht në këtë garë të FIBA-s.
Skuadra nga Prizreni, këtë verë ka bërë ndryshime të mëdha pasi synon të gjithë trofetë në basketbollin kosovar dhe po ashtu, një paraqitje të denjë në Evropë.
Krahas trajnerit Igor Jovoviq, Bashkimi ka mbajtur bazën e lojtarëve vendor, të cilëve ua ka shtuar edhe Jan Palokajn, ndërsa ka angazhuar edhe amerikanë prej të cilëve presin shumë.
