Është partia e parë shqiptare në Kosovë.
Fillesa e saj është tek bashkimi i një grupi të shkrimtarëve dhe intelektualëve gjatë shtatorit dhe tetorit të vitit 1989.
Qëllimi i saj ishte artikulimi i kërkesave politike të shqiptarëve, gjatë kohës së rëndë nëpër të cilën Kosova po kalonte nën okupimin serb.
Ky bashkim i intelektualëve dhe shkrimtarëve, u quajt Lidhja Demokratike e Kosovës.
Udhëheqësia e parë e saj, përbëhej nga Ibrahim Rugova, si kryetar dhe Jusuf Buxhovi si sekretar.
Postin e të parit të LDK-së, Rugova e mbajti deri në fund të jetës së tij, në janarin e ftohtë të vitit 2006, kur ndërroi jetë.
Vdekja e liderit historik, solli edhe ndarjen e madhe në LDK.
Pasuesi i Rugovës u zgjodh vetëm pas një kuvendi të dhunshëm me karrige.
LDK u nda në dysh, mes atyre që përkrahnin Fatmir Sejdiun dhe atyre që e donin tashmë të ndjerin Nexhat Daci në krye të partisë.
Përfundimisht, pas Kuvendit të vitit 2006, Fatmir Sejdiu u zgjodh kryetar i LDK-së, kurse Nexhat Daci bashkë me një pjesë të rëndësishme të LDK-së, në partinë që u quajt Lidhja Demokratike e Dardanisë.
Fatmir Sejdiu do të qëndronte në drejtim të LDK-së deri në nëntorin e vitit 2010.
Përpos udhëheqësisë së LDK-së, gjatë kësaj periudhe kohore, Sejdiu mbante edhe timonin e shtetit, si president i Kosovës.
Ai ishte presidenti i parë i Republikës, dhe njëri nga nënshkruesit e parë të deklaratës së pavarësisë.
Sejdiu garoi edhe për një mandat të dytë në krye të LDK-së, por nuk ia doli.
