Mbrojtësi i krahut, Shkëlzen Lushtaku nuk do të jetë më pjesë e skuadrës së Drenicës, ku si kapiten e ndihmoi të rikthehet në Superligë.
Me anë të një postimi në Facebook, Lushtaku ka bërë të ditur se po largohet nga Drenica me kokën lart, duke falënderuar klubin, bashkëlojtarët, trajnerët më të cilët ka punuar dhe të gjithë atyre që i besuan dhe mbështetën.
“Për më shumë se 23 vite në këtë fushë, dhashë gjithçka që pata: djersën, mundin, shpirtin dhe zemrën time”, ka shkruar ndër të tjera Lushtaku.
Lushtaku që është fëmijë i Drenicës, ka pasur falënderim të veçantë edhe për tifo-grupin “Shqiponjat e Zeza” kurse nuk e ka harruar as familjen e tij, e cila i qëndroi pranë në çdo moment dhe ishte forca më e madhe për të.
“Sot largohem nga fusha, por jo nga Drenica. Sepse Drenica nuk është vetëm një klub. Është zemra ime, është identiteti im, është jeta ime”, ka shtuar Lushtaku, duke thënë se së shpejti do ti njoftojë të gjithë për të ardhmen e tij.
