Kampioni i Kosovës në basketboll, Golden Eagle Ylli, nuk di për fitore në këtë edicion të Superligë. Ylli të dielën mbrëma pësoi humbjen e tretë rresht. Pësoi në “Karagaçi” nga Peja me rezultatin 73:57.
Për Pejën është fitorja e tretë rresht. Vetëm fitore pas tri xhirove të para ka edhe Trepça. Ylli e nisi mirë ndeshjen dhe çerekun e parë e fitoi 21:11. Madje kishte epërsi prej 15 pikëve, 21:6.
Në çerekun e dytë epërsia e Yllit u zvogëlua. Pas 20 minutave lojë rezultati ishte 30:24 në të mirë të ekipit mysafir. Peja vazhdoi rikthimin edhe në çerekun e tretë, të cilin e fitoi 25:19. Në fund të periudhës së tretë kaloi në epërsi 49:47 dhe më nuk u ndalë. Periudha e katërt u takoi plotësisht pejanëve, 24:8, që kishin përkrahje të madhe nga tribunat. Palestra në Pejë ishte gati e mbushur me shikues.
Qendra Bradly Waldow ishte më i miri te Peja me 15 pikë e 13 kërcime. Isiah Umipig i kishte 15 pikë e katër asistime. Rodney Purvis shtoi 13 pikë, ndërsa Jalen Tate i kishte 12 pikë. Prej vendorëve më efikasi ishte Arti Hajdari me 10 pikë.
Te Golden Eagle Ylli u dallua Henrik Shirko me 16 pikë e tetë kërcime. Ardit Pepaj i shtoi 11 pikë e tetë kërcime, ndërsa Ismet Sejfiq realizoi nëntë pikë e pesë kërcime. Suharekasit i kishin plot 22 topa të humbur. Trajneri i Yllit, Adis Beqiragiq, sërish nuk ka mundur të llogarit në kapitenin Gëzim Morina dhe Malcolm Armstedin, që janë të lënduar. Ylli pos në Superligë ka pësuar humbje edhe në kualifikimet e Ligës së Kampionëve. U ndal në ndeshjen e parë nga Benfica, kampionia e Portugalisë. Në Superligë, Ylli ka pësuar fillimisht nga Rahoveci e më pas në shtëpi nga Sigal Prishtina. Ndërkohë Peja ka fituar ndaj Prishtinës dhe Ponte Prizrenit.
