Kryetari i Partisë Liberale Egjiptiane, Veton Berisha, ka folur për herë të parë publikisht lidhur me çështjen e deklarimit të pasurisë në emisionin “Këndi i debatit” në Tëvë1.
I pyetur nga analisti politik Xhevdet Pozhari nëse ka deklaruar në mënyrë të saktë pasurinë e tij, Berisha theksoi se gjithçka është e raportuar sipas ligjit dhe se nuk ka asgjë për të fshehur.
“Unë kam lindur milioner. Vij nga fshati Qyshk, jam nipi i Ukë Sallah Berishës, që njihet gjerësisht në atë zonë. Jetoj në një vend ku kemi rreth 5 hektarë tokë me vlerë të konsiderueshme – dhe unë nuk mund të ndryshoj këtë fakt. E kam deklaruar të gjithë pasurinë time në formularët zyrtarë,” tha Berisha.
Ai gjithashtu përmendi se bashkëshortja e tij punon si gjinekologe prej disa vitesh dhe se shumica e familjarëve të tij janë të punësuar jashtë vendit.
“Unë vetë punoj që nga viti 2008, dhe gjatë gjithë kësaj kohe është normale që kam blerë banesë dhe gjëra të tjera. Të gjitha i kam të deklaruara sipas rregullave ligjore,” shtoi ai.
Deklarimi i pasurisë së zyrtarëve publikë është një ndër temat më të ndjeshme në diskursin publik, dhe reagimi i Berishës vjen në një kohë kur rritet presioni për transparencë ndaj përfaqësuesve politikë në Kosovë.
