Ish-presidentja e Kosovës dhe njëherësh kandidatja për presidente nga LDK-ja, Vjosa Osmani, ka folur në emisionin “Këndi i Debatit” në Tëvë1 për mënyrën se si po zhvillohet fushata zgjedhore dhe gjuhën që po përdoret në diskursin publik.
Osmani ka deklaruar se në Kosovë po zhvillohet një “dhunë digjitale”, e cila sipas saj po ndikon në përçarjen e shoqërisë dhe familjeve shqiptare.
“Po flas për një dhunë digjitale e cila është në nivel Kosove, e cila po synon që të përçajë vëllanë me vëllanë, motrën me motrën, që brenda një familjeje të nxisë dhunë, akuza për tradhti e shumëçka tjetër. Po flas për dhunë digjitale ku në baza ditore ofendohen nënat shqiptare me terminologjinë më të rëndë që mund të dëgjojmë”, është shprehur Osmani.
Ajo ka thënë se kjo gjuhë po nxit edhe kërcënime e dhunë fizike ndaj figurave publike dhe familjeve të tyre.
“Po flas për një dhunë digjitale e cila nxit edhe dhunë fizike. Në baza ditore marrim kërcënime si: ‘kemi me të varë në shesh’, ‘kemi me ta bo kështu, kemi me ta bo ashtu’. Këto gjëra ndodhin çdo ditë, madje edhe në raport me familjen”, ka deklaruar ajo.
E pyetur nëse këto kërcënime ndikojnë tek ajo personalisht, Osmani është përgjigjur se sulmet vetëm sa e motivojnë më shumë për të vazhduar punën me qytetarët.
“Unë jam mësuar dhe e kam thënë edhe më herët: sa më shumë që ata mundohen të më godasin në këtë mënyrë, aq më shumë më japin motiv që të punojmë me qytetarët e Kosovës që njëherë e përgjithmonë ta ndalim një përçarje të tillë të popullit shqiptar”, ka thënë Osmani.
Tutje, ajo ka shtuar se është shqetësuese mënyra se si fyhen dhe njollosen deputetët, gratë dhe njerëzit që, sipas saj, ia kanë dedikuar jetën vendit.
“Është e tmerrshme se si deputetët, gratë që janë me ne dhe njerëzit që ia kanë dedikuar jetën këtij vendi akuzohen, njollosen e fyhen. Këto janë njollosje të përmasave që nuk janë parë më herët në histori”, ka përfunduar Osmani.
