Krerët e Juventusit janë të vendosur sa i përket të ardhmes së Edon Zhegrovës te skuadra nga Serie A e Italisë.
Te klubi nga Torino, janë të fokusuar në qëndrimin e Zhegrovës edhe pas përfundimit të sezonit aktual, ka shkruar “Calciomercato” të enjten.
Tek Juventusi vlerësojnë se teknika e Zhegrovës mund të jetë e dobishme dhe për këtë arsye llogaritin në reprezentuesin e Kosovës.
“Nuk ka gjasa që Juventusi ta konsiderojë Zhegrovën një titullar të përhershëm për të ardhmen, por me një përgatitje të mirë verore, pa lëndime dhe pas një viti ambientimi dhe përshtatjeje në Itali, Juventusi beson se lojtari mund të rrisë kontributin e tij në kauzën e Bianconerëve”, ka shkruar sajti italian.
Zhegrova para fillimit të këtij sezoni iu bashkua Juventusit nga Lille për 20 milionë euro dhe firmosi kontratë deri në vitin 2030, por shifrat e tij te skuadra italiane janë zhgënjyese.
26-vjeçari deri më tani ka regjistruar 16 paraqitje për Juventusin në të gjitha garat, ndërsa në vetëm një ndeshje ishte titullar, ku në total ka 319 minuta lojë, dhe asnjë gol e asnjë asistim.
