Në Gjykatën Themelore të Ferizajt është mbajtur seanca fillestare ndaj Leutrim Fejzës (27 vjeç), i akuzuar për vrasjen e rëndë të të riut Bekim Vari, rast që tronditi opinionin publik në fillim të këtij viti.
Në fillim të seancës, Fejza deklaroi se nuk e pranon fajësinë për veprën që i vihet në barrë.
“Jo, nuk e kam vra,” tha shkurt Fejza para trupit gjykues, duke mohuar të ketë pasur ndonjë përfshirje në vrasjen e të ndjerit.
Sipas aktakuzës së ngritur nga Prokuroria Themelore në Ferizaj, Fejza akuzohet se më 23 janar 2025, pas një konflikti të mëparshëm me viktimën, e ka privuar nga jeta Bekim Varin dhe më pas e ka groposur trupin e tij në një zonë malore të fshatit Manastirc.
“Prokuroria ka prova të mjaftueshme që tregojnë përfshirjen e të pandehurit në këtë ngjarje. Ngjarja është e dokumentuar përmes provave materiale dhe dëshmive të siguruara gjatë hetimeve,” tha prokurori i rastit, Shukri Jashari, gjatë paraqitjes së aktakuzës.
Në aktakuzë thuhet se viktima Bekim Vari, 27-vjeçar nga Ferizaj, ishte raportuar si i zhdukur nga familjarët më 29 janar 2025, ndërsa trupi i tij i pajetë ishte gjetur më 5 shkurt 2025 në një zonë malore të fshatit Manastirc të Ferizajt.
