Pas javës së parafundit ku ranë në sy aleancat e marrëveshjet ndërmjet klubeve, duke detyruar të reagoj edhe një si Tahir Batatina, java e fundit e Superligës të dielën, e zbulon vetëm një dilemë, skuadrën e vetme që do të luaj në barazh.
Në pozitën e tetë është ekipi i Llapit, që pavarësisht fitores ndaj Malishevës, nuk arriti të largohet nga kjo pozitë, pasi edhe skuadrat e tjera të rrezikuara, befasisht fituan të gjitha.
Në javën e fundit, që luhet të dielën nga ora 16:00, në kohën kur zhvillohet edhe miqësorja e Kosovës me Çekinë në Pragë, duelet kryesore përfshijë katër skuadra, por skuadra më e rrezikuar mbetet ajo e Llapit.
Llapjanët janë mysafirë të Ferizajt, ekipit që ra nga liga dy javë më parë. Ekipi i Batatinës i ka 46 pikë, dhe me fitore mund të shpëtoj, por i duhet që të gaboj njëra nga Drenica që ka 47 pikë, apo Gjilani e Dukagjini nga 48 sosh.
Drenica është mysafire e Prishtinës. Kjo e fundit megjithëse ka 49 pikë, e ka siguruar mbetjen në ligë, pasi ka rezultat pozitiv në takimet e ndërsjella me Llapin. Edhe ekipit nga Skenderaj i duhet vetëm fitorja, pasi çdo rezultat tjetër i shkon në favor Llapit.
Dukagjini luan me Ballkanin dhe nuk guxon të gabojë, e njësoj edhe Gjilani që përballë skuadrës së fundit në tabelë Prishtinës së Re, i duhet fitorja për të mos rrezikuar të mbes në barazh.
