Avokati Arbër Jashari ka vlerësuar se aktgjykimi i fundit i Gjykatës Kushtetuese lidhur me seancën konstituive të Kuvendit paraqet një mundësi reale për të zgjidhur ngërçin politik, megjithatë ka paralajmëruar se rreziku për bllokadë nuk përjashtohet nëse partitë vazhdojnë me sjellje destruktive.
“Është një mundësi e mirë për të dalë prej kësaj situate, por nuk përjashtohet mundësia që, nëse partitë vazhdojnë me sjellje përçarëse dhe që bien ndesh me integritetin e tyre politik, sërish mund të kemi bllokadë”, ka deklaruar Jashari në emisionin “Ditari” në Tëvë1.
Ai theksoi se ndryshe nga aktgjykimi i mëparshëm që kishte lënë paqartësi sa i përket mënyrës së votimit për zgjedhjen e kryetarit të Kuvendit, kësaj here Gjykata ka qenë më e qartë dhe ka urdhëruar që votimi të bëhet në mënyrë të hapur.
“Risi e këtij vendimi është që kufizohet edhe numri i herëve që mund të propozohet i njëjti kandidat nga partia më e madhe parlamentare”, shtoi Jashari.
Vendimi i Kushtetueses, përveç që shpalli të pavlefshme seancat e mbajtura nga 27 qershori deri më 26 korrik, ka urdhëruar që Kuvendi të zgjedhë kryetarin dhe nënkryetarët brenda 30 ditësh nga hyrja në fuqi e këtij aktgjykimi. /teve1.info/
