Xhavit Jashari nga OVL-UÇK ka bërë thirrje për mobilizim të përgjithshëm qytetar, në protestën e paralajmëruar për të mërkurën në ora 17:00, kundër padrejtësisë që po u bëhet ish-krerëve të UÇK-së në Hagë.
Sipas Jasharit, nuk është në pyetje vetëm fati individual i ish-krerëve, por e gjithë lufta e UÇK-së dhe vetë themeli i shtetit të Kosovës.
Ai kërkoi reagim të fuqishëm nga të gjitha segmentet e shoqërisë – nga shoqëria civile, organizatat, faktori politik dhe institucionet.
“Presim një masë të fuqishme, pa dallim nga të gjitha shoqëritë civile, nga organizatat e ndryshme, nga faktori politik, por edhe nga institucionet, sepse mendoj se këtu është në pyetje lufta e UÇK-së… Po preket shteti i Kosovës, por mbi të gjitha po preket vlera e kombit dhe popullit”, u shpreh Jashari në emisionin “Mesditë” në Tëvë1.
Ai theksoi se protesta nuk është kundër drejtësisë, por për drejtësi të vërtetë, duke e konsideruar procesin gjyqësor ndaj ish-krerëve të UÇK-së si padrejtësi.
“Si organizatë nuk jemi kundër drejtësisë, por jemi për drejtësi. Kjo protestë është thirrur që të reagohet në emër të realitetit dhe drejtësisë, por gjithsesi të kundërshtohet padrejtësia që po bëhet karshi ish-krerëve të UÇK-së dhe ndaj luftës së pastër të popullit tonë”, tha ai.
Organizata e Veteranëve të Luftës së UÇK-së ka bërë thirrje për pjesëmarrje masive në protestën e nesërme në Prishtinë, si shenjë solidarizimi me ish-krerët e UÇK-së dhe për të kundërshtuar zhvillimet e fundit në procesin gjyqësor në Hagë.
