27-vjeçari, Agon Zejnullahu ka mbetur i vdekur të hënën në Lipjan, për të cilin janë arrestuar pesë zyrtarë policorë nën dyshimet për “vrasje nga pakujdesia”.
E për këtë, avokati Arbër Jashari në një intervistë në emisionin “Ditari” në tëvë1 ka deklaruar se ky rast është bërë më tragjik për faktin se viktima ka vdekur në duart e zyrtarëve policor.
Sipas avokatit, përdorimi i forcës së Policisë së Kosovës është i lejuar, por në kushte të veçanta, duke theksuar se ky rast është dashur të menaxhohet më mirë.
Derisa, avokati ka treguar se dënimi për veprën penale “vdekje nga pakujdesia” është deri në 5 vite.
“Fatkeqësisht më tragjik e bënë këtë rast fakti që kjo ka ndodhur në duart e zyrtarëve policor dhe në prani të shumë kamerave. E kemi parë atë situatë që nuk është aspak e mirë sidomos kur ndodh në duart e shtetit ose zyrtarëve policor. Prandaj ky rast është tragjik dhe paprecedent. Përdorimi i forcës së Policisë është e lejuar por me kushte të veçanta. Ky rast ka mundur të menaxhohet më mirë gjithsesi këtyre videove duhet të ketë edhe prova të tjera, është e rëndësishme të pritet raporti i obduksionit. Dënimi për veprën penale “vdekje nga pakujdesia” është maksimumi deri në 5 vite burgim, nuk është dënim i rëndë, zakonisht veprat penale nga pakujdesia janë të dënueshme kur ligji shprehimisht e parasheh se për këtë vepër penale kryesi duhet të dënohet edhe nëse e ka kryer nga pakujdesia”, ka deklaruar Jashari./teve1.info/
