Pas rinovimit të kontratave me disa futbollistë kyç, Drita e Gjilanit ka bërë edhe përforcimin e parë për sezonin 2026/27.
Bëhet fjalë për sulmuesin Igball Jashari, i cili të hënën është prezantuar te kampionia në fuqi e Kosovës.
Jashari te Drita është transferuar nga Drenica kurse me klubin e ri ka firmosur kontratë afatgjate.
20-vjeçari është pjesë e rëndësishme te Kosova U21, ndërsa rol kyç në sezonin e sapopërfunduar pati edhe te Drenica, ku realizoi 5 gola dhe bëri 4 asistime në Superligë.
“Kemi kënaqësinë të njoftojmë se Igball Jashari është përforcimi më i ri i FC Dritës. Igballit i urojmë mirëseardhje në familjen bardhekaltër dhe shumë suksese me fanellën e klubit tonë”, shkruan Drita në njoftim.
Skuadra e Dritës në sezonin e ri, do të paraqitet në kualifikimet e Ligës së Kampionëve.
