Avokati Arbër Jashari ka cilësuar si ndërhyrje në vullnetin politik të serbëve të Kosovës paralajmërimin e presidentit të Serbisë, Aleksandar Vuçiq, se brenda dhjetë ditëve të ardhshme do të hapen 400 vende të reja pune në sistemin e kujdesit shëndetësor të Kosovës.
Sipas Jasharit, ky sistem shëndetësor funksionon në mënyrë paralele dhe jashtë kornizës ligjore të Republikës së Kosovës.
Ai ka theksuar se nuk është hera e parë që shteti serb përdor mjete të tilla për të favorizuar subjektin politik Lista Serbe.
“Presidenti serb, Aleksandar Vuçiç, ka deklaruar se brenda dhjetë ditëve të ardhshme do të hapen 400 vende të reja pune në sistemin e kujdesit shëndetësor të Kosovës. Sistem ky paralel dhe jashtë ombrelles ligjore te Republikes se Kosoves. Kjo nuk është hera e parë që shteti serb përdor mjete të tilla për të ndikuar në vullnetin politik të qytetarëve serbë të Kosovës, në favor të subjektit politik që mbështetet nga Beogradi – Listës Serbe. Edhe në të kaluarën kemi parë përpjekje për ndikim mbi votuesit serbë përmes skemave paralele sociale apo formave të tjera të presionit dhe ndikimit”, ka shkruar ai në Facebook.
Në fund, Jashari ka nënvizuar se zgjedhjet nuk mund të konsiderohen plotësisht të lira dhe demokratike përderisa komuniteti serb nuk ka mundësinë të zgjedhë lirshëm dhe pa imponime përfaqësuesit e vet politikë.
“Duhet theksuar se Kushtetuta dhe ligjet e Republikës së Kosovës garantojnë zgjedhje të lira dhe demokratike. Megjithatë, zgjedhjet nuk mund të konsiderohen plotësisht të lira e demokratike, përderisa komuniteti serb nuk ka mundësinë të vendosë lirshëm dhe pa imponime për përfaqësuesit e vet politikë”, ka përfunduar ai./teve1.info/
