Sulmuesi i skuadrës së Llapit, Ahmed Januzi e ka fituar epitetin e futbollistit më të mirë për xhiron e 34-të në Superligën e Kosovës në futboll.
FFK-ja, të hënën ka bërë të ditur se Januzi është nderuar me çmimin “Ylli i Javës”, i cili ndahet pas përfundimit të çdo xhiroje. Komisioni i veteranëve të futbollit, ka vlerësuar lart Januzin për paraqitjen e tij në ndeshjen e fundit, në të cilën Llapi e mposhti në shtëpi Malishevën.
Në fakt, Januzi e shënoi golin e vetëm në këtë takim, në të cilin Llapi triumfoi 1:0 duke e mbajtur ekipin nga Podujeva në garë për titullin e kampionit. Januzi është shprehur tejet i lumtur me çmimin e fituar dhe ka paralajmëruar se Llapi nuk do të dorëzohet deri në fund për titullin e kampionit.
“Suksesi nuk është meritë vetëm e imja, por e gjithë ekipit. Harmonia midis lojtarëve dhe trajnerëve është çelësi për sukses. Në dy javët e fundit, synojmë vetëm fitore. Do të luftojmë deri në fund, por duhet të kuptohet se arritja e titullit nuk varet vetëm nga ne, por edhe nga rezultatet e rivalit tonë”, tha ndër të tjera Januzi për faqen zyrtare të FFK-së.
Aktualisht, Llapi zë vendin e dytë në tabelë me 68 pikë, katër më pak se Ballkani që është lider kur kanë mbetur edhe dy xhiro deri në fund të edicionit.
Këtë vikend, Llapi luan në Podujevë kundër skuadrës së Ballkanit.
