Plot 500 ndeshje. Plot 200 gola.
Jamie Vardy është përshëndetur të dielën si legjendë e vërtetë me Leicester Cityn. Nga kjo skuadër largohet në fund të edicionit. Te Leicester City është për plot 13 vjet, nga viti 2012. Dhe 38-vjeçari ka vendosur të largohet. Ndeshja e së dielës ishte e fundit për të. Ishte ndeshja e 500-të e Vardyt për Leicesterin, në të cilën e shënoi golin e 200-të për këtë skuadër.
Ai ka përjetuar shumë gjëra te Leicester City. E udhëhoqi këtë skuadër drejt titullit të kampionit të Anglisë në vitin 2016. Po ashtu drejt triumfit në FA Cup në vitin 2021, kur Leicesteri e fitoi edhe Superkupën.
Vardy dy herë ka rënë nga Premier League me Leicesterin, por i ka qëndruar besnik skuadrës. Dhe largohet si ikonë.
Në xhiron e parafundit të Premier Leagues, Leicesteri fitoi 2:0 ndaj Ipswich Town. Vardy e shënoi golin për 1:0 në minutën e 28-të. Për 2:0 shënoi Kasey McAteer në minutën e 69-të. Vardy e la fushën në minutën e 80-të, në një moment shumë emocional të ndeshjes. E gjithë ndeshja në “King Power Stadium” ishte shumë emocionale.
Vardy në fund të ndeshjes është shfaqur i buzëqeshur, por më pas edhe shumë i emocionuar. Të gjithë në stadium kanë mbajtur flamuj falënderues ndaj Vardyt, ikonës së klubit.
Leicesteri ka vendosur që kjo të jetë ndeshja e fundit e Vardyt, në mënyrë që tifozët të kenë rastin ta përcjellin atë në mënyrën që e meriton.
Thirrja e emrit të tij nuk është ndalur gjatë nga tifozët e Leicesterit.
Leicester City është i 18-ti në Premier League dhe edicionin e ardhshëm do të luajë në kategorinë e dytë angleze. Por Vardy nuk do të jetë për ta udhëhequr skuadrën drejt një tjetër kthimi në elitë.
Në ndeshjen e 500-të, legjenda Vardy e shënon golin e 200-të
Jamie Vardy po e luan ndeshjen e 500-të dhe të fundit për Leicester Cityn.
Dhe legjenda e këtij klubi e ka realizuar golin e 200-të.
Vardy ka vendosur të largohet nga Leicesteri pas 13 vjetësh. Leicesteri po fiton 1:0 ndaj Ipswichit.
