Nënkryetari i Partisë Demokratike të Kosovës, Uran Ismaili, thotë se mosbesimi i presidentes Osmani ndaj Institucioneve Publike Shëndetësore, është për keqardhje.
“Qindra dhe mijëra qytetarë të Kosovës marrin shërbime shëndetësore çdo ditë në institucionet publike. Rrjedhimisht, fuqizimi dhe mbështetja e tyre duhet të jetë prioritet për secilin zyrtar dhe secilën qeverisje të vendit.Sot, është për keqardhje mosbesimi i madh që ky koalicion qeverisës po tregon ndaj Institucioneve Publike Shëndetësore, siç është rasti i operimit të Presidentes në një klinikë private”, ka shkruar Ismaili në Facebook.
Tutje, ish-ministri i shëndetësisë, më shqetësuese konsideron faktin që edhe Qeveria Kurti e neglizhon këtë sektor, raporton teve1.info.
“Brenda pak muajve po e presim ministrin e tretë të Shëndetësisë, ndërkaq, po bëhen tashmë një muaj që kur ky sektor është PA ministër. Shëndetësia nuk ndreqet me konferenca për media e as me vizita në shërbim të PR-it personal, por vetëm me investime konkrete, të cilat, fatkeqësisht, ende nuk po i shohim askund”, ka shkruar tutje ai.
Paraprakisht, Presidenca ka bërë të ditur se Osmani ka pasur një intervenim të lehtë kirurgjik apo ndryshe heqja e tëmthit (idhëzes).
Teksa, përmes komunikatës, ata njoftuan se Osmani ka bërë bartjen e përkohshme të përgjegjësive te kryetari i Kuvendit, Glauk Konjufca.
