Më 17 gusht ishte larguar nga shtëpia.
Për 80-vjeçarin nga Ferizaj që ishte raportuar i zhdukur, kërkimet kishin filluar menjëherë.
E që nga atëherë, Shoqata e Kosovës për Kërkim dhe Shpëtim s’kishte rënë në gjurmë të tij, tek këtë të hënë.
Në një njoftim, nga kjo Shoqatë bënë të ditur se Hamëz Ismali u gjet në Tiranë.
Aktualisht, ai gjendet në Spital, ku po merr trajtim mjekësor.
Florim Neziraj nga Shoqata e Kërkim-Shpëtimit njofton se 80-vjeçari ishte gjetur në një rrugicë para se të hynte në qytetin e Tiranës.
“Kemi arritur që sot, pas tri javësh të plota dhe pas 10 ditësh kërkimi intensiv, ta gjejmë personin e humbur”, deklaroi Florim Neziraj.
Tutje, Neziraj tregon se i moshuari kishte qëndruar për 15 ditë duke u endur rrugëve.
Ndër të tjerash, ai ka një apel për institucionet.
“Apeli im është që institucionet të jenë më të afërta ndërmjet tyre, sidomos ata të Policisë së Kosovës me ata të Shqipërisë, sepse po të ishte një bashkëpunim shumë më i mirë, do të arrinim ta gjenim shumë më parë”, theksoi Neziraj.
Pas trajtimit mjekësor, Neziraj njofton që do të bëjnë edhe asistimin e Ismalit deri te familja e tij në Ferizaj.
