Bogujevci ka theksuar se kjo ka qenë një punë e përbashkët e kolegëve, sekretariatit por edhe ambasadave për të cilat ajo tha se i ka pasur në përkrahje gjatë gjithë kohës.
“Ka qenë një emocion i jashtëzakonshëm, është me të vërtetë një nder i madh që më është dhënë që të flas në emër të Republikës së Kosovës për herë të parë në Asamblenë Parlamentare të Këshillit të Evropës. Ka qenë në përgjithësi një energji shumë pozitive, nënkryetarja e Asamblesë gjithashtu e hapi mundësinë ku i njoftoj përsëri kolegët që na është dhënë e drejta e fjalës dhe njëkohësisht na uroi edhe mirëseardhje, që ishte shumë e këndshme dhe ka qenë tejet emocionuese. Por siç e kam thënë edhe më herët jam shumë falënderuese edhe ndaj kolegëve të mi, por edhe ndaj të tjerëve përreth sekretariati, ambasadat të cilët i kam pasë afër dhe në përkrahje gjatë gjithë këtij procesi. Kështu që kjo është një punë e përbashkët, po unë e pata nderin që si udhëheqëse e delegacionit ta marr fjalën për herë të parë”, ka thënë ajo për tëvë1.
Tutje Bogujevci tha se duke u nisur nga fakti që Këshilli i Evropës është organizatë që lidhet me të drejtat e njeriut, ajo tha se pikërisht përmendja e qëndrimit të Kosovës ndaj Ukrainës, ishte vetëm se një e drejtë duke marrë parasysh që kemi kaluar edhe ne në të njëjtën situatë.
“Këshilli i Evropës është një institucion që lidhet me të drejtat e njeriut dhe natyrisht që tema e Ukrainës është e pranishme në të gjitha takimet që i kemi dhe mbasi m’u dha mundësia për herë të parë të flas, ishte vetëm se e drejtë që të përmendë qëndrimin e Kosovës dhe përkrahjen që Kosova e ka dhënë ndaj Ukrainës, në këto momente të vështira sidomos ne si një vend dhe një popull që e kemi përjetu një tmerr të ngjajshëm nga fqinjët tanë”, tha tutje ajo.
Kurse duke pasur parasysh se Kosova është në proces të anëtarësimit të plotë, Bogujevci theksoi rëndësinë e komunikimit dhe me deputetë, vendet e të cilëve ende nuk e kanë njohur shtetin e Kosovës.
“Ne jemi mundu që të mbajmë kontakte me kolegët tanë, t’i takojmë të bashkëbisedojmë, t’i njoftojmë rreth zhvillimeve në Kosovë. Nuk është që kemi pasë ndonjë kundërshtim gjatë diskutimit, ka qenë mund të them një lloj konsensusi për kur është marrë vendimi për dhënien e të drejtës së fjalës për Kosovën në seancë plenare. Kështu që nuk kemi pasë ndonjë kundërshtim po natyrisht ne jemi në proces të anëtarësimit të plotë dhe është e domosdoshme dhe shumë e nevojshme të kemi komunikim edhe me kolegë, deputetë të vendeve të cilat ende nuk e kanë njohur Kosovën. Por që shpresojmë që në të ardhmen do ta bëjnë një gjë të tillë, por pa marrë parasysh ne duhet ta kemi një raport me ta dhe të komunikojmë” shtoi tutje ajo./teve1.info.
