Ish-trajneri i përkohshëm i Baselit mund të marrë drejtimin e skuadrës nga Superliga, FC Malisheva. Sipas portalit zviceran “4-4-2” mes palëve tashmë kanë nisur bisedimet.
Luigi Nocentini mund të rikthehet së shpejti në pankinë, kësaj radhe në futbollin kosovar. Trajneri 37-vjeçar italian, i cili së fundmi ishte në krye të FC Basel si trajner i përkohshëm, është një nga kandidatët për ta marrë drejtimin e FC Malishevës.
Sipas raportimit të portalit zviceran “4-4-2” mes Nocentinit, i cili aktualisht është pa klub, dhe drejtuesve të Malishevës tashmë kanë nisur bisedimet për një bashkëpunim të mundshëm.
Klubi kosovar është në kërkim të pasuesit të Thomas Brdaric, trajnerit gjerman që e mori drejtimin e skuadrës gjatë verës, por që tashmë është larguar për të marrë drejtimin e Al-Bukiryah FC, klub që garon në kategorinë e dytë të futbollit saudit.
Pavarësisht ndryshimit të trajnerit, Malisheva e ka nisur sezonin në mënyrë mjaft pozitive. Pas shtatë ndeshjeve të zhvilluara, skuadra ka grumbulluar 16 pikë dhe renditet në vendin e dytë në Superligën e Kosovës.
Për Nocentinin, një marrëveshje me Malishevën do të përfaqësonte mundësinë e parë për të marrë drejtimin e një skuadre si trajner kryesor në një projekt afatgjatë.
Përvoja e tij e fundit ishte te Baseli, ku mori përkohësisht drejtimin e skuadrës pas shkarkimit të Stephan Lichtsteiner. Nocentini e nisi aventurën me fitore në udhëtim ndaj Luzernit, por më pas pësoi humbje 1:3 në shtëpi kundër St. Gallenit, para pushimit për ndeshjet e kombëtareve.
