Luca Toni, një nga sulmuesit më të famshëm të së kaluarës në futbollin italian në një intervistë të fundit për “Tuttomercatoweb”, shprehet se Victor Osimhen i Napolit, i kujton Didier Drogba. Ish-lojtari i Fiorentinës ndalet edhe tek futbolli italian që sipas tij po prodhon gjithnjë e më pak numra 9, teksa shton se në skuadrat elitare të Italisë ju jepet hapësirë të huajve.
“Osimhen është për mua një nga sulmuesit më të fortë në Europë, më pëlqen shumë. E kam parë edhe nga afër dhe më kujton shumë Didier Drogba. Është i fortë në zonë, ka shpejtësi dhe është një lider. Një tjetër faktor është edhe trajneri Luciano Spalletti që e ka përmirësuar shumë në aspektin e lojës në skuadër.
Pse në kombëtaren e Italisë nuk ka më risi në sulm? Sepse nuk ka më lojtarë. Po të shohim skuadrat e pjesës së sipërme të renditjes në Itali, nuk gjen më sulmues italian. Hapësirat ju jepen të huajve dhe kështu bëhet e vështirë edhe për trajnerin Roberto Mancini.
Duhet të rikthehemi dhe të krijojmë sulmues. Por, unë shoh rrezik edhe në mbrojtje sepse kur të largohet Bonuci do të kemi probleme në qendër. Po ashtu edhe në të djathtë që janë gjithnjë e më të pakët. Do të duhet kohë që të prodhojmë sërish lojtarë, por shpresoj që situata do të ndryshojë për mirë”, u shpreh Toni.
