Ish-polici kosovar Arbnor Spahiu, i cili u lirua të premten mbrëma nga autoritetet serbe, ka reaguar publikisht duke e quajtur arrestimin e tij një proces të montuar politikisht dhe krejtësisht të padrejtë.
Në një postim në Facebook, Spahiu ka bërë të ditur se gjendja e tij shëndetësore është e mirë dhe ka shprehur mirënjohje për mbështetjen e vazhdueshme nga institucionet dhe qytetarët e Kosovës.
“Përshëndetje Kosova ime. Dje në mesditë jam liruar nga burgu i Serbisë, ku kam qenë i arrestuar padrejtësisht që nga 7 qershori i këtij viti për akuza të rënda, të cilat kanë qenë pjesë e një procesi plotësisht politik dhe të padrejtë. Dua t’ju njoftoj se jam mirë, më i fortë se kurrë dhe mirënjohës për çdo mbështetje gjatë kësaj periudhe të vështirë”, shkroi ai të shtunën.
Spahiu ishte mbajtur në paraburgim në Serbi nën akuzat për “vrasje të rëndë” të lidhura me ngjarjet në Banjskë të vitit 2023.
Ai u arrestua në qershor të këtij viti në pikën kufitare ndërmjet Serbisë dhe Hungarisë.
Pas lirimit të tij, Ministria e Jashtme e Kosovës deklaroi se akuzat ndaj Spahiut ishin të motivuara politikisht dhe kërkoi nga autoritetet serbe që të ndalojnë praktikat e tilla ndaj qytetarëve të Kosovës.
