Paraqitja e kryeministrit në detyrë, Albin Kurti, në Gjykatën Themelore në Prishtinë ka ngjallur reagime të shumta.
Kjo pasi Kurti më herët kishte refuzuar të shkonte në Prokurorinë Speciale për të dëshmuar për rastin e rezervave shtetërore.
E këtë ia ka kujtuar edhe deputetja e PDK-së, Vlora Çitaku.
“Pra, A.K. shkon në gjykatë për të dëshmuar kundër Klinakut, ‘krimi’ i të cilit ishte një status në Facebook. Por, kur bëhet fjalë për aferat milionëshe të vartësve të tij, refuzon t’i përgjigjet Prokurorisë. Kush ka sy me pa dhe vesh me dëgju, e kupton se situata është mëse e qartë”, ka thënë Çitaku
Paraqitjen e Kurtit në Gjykatë e ka kritikuar edhe deputeti i LDK-së, Avdullah Hoti.
“Kur ftohet nga organet e drejtësisë për të dëshmuar në një rast të dyshuar korruptiv, ai nuk paraqitet. Në vend të kësaj, i fyen dhe i përçmon zyrtarët e drejtësisë, duke e diskredituar shtetin në sytë e qytetarëve dhe të aleatëve. Por, kur organet e drejtësisë e thërrasin për një rast të dyshuar kërcënimi ndaj tij, ai paraqitet aty pa asnjë problem, duke u viktimizuar”, u shpreh Hoti
Ngjashëm ka reaguar edhe Arton Demhasaj, anëtar i Aleancës për Ardhmërinë e Kosovës.
“Pamje ‘historike’ – Kryeministri në detyrë/Deputeti Kurti, dëshmon në gjykatë për një kërcënim! Ama për aferat me miliona e miliona euro, tendera, korrupsion nuk bën me shku me deshmu në Prokurorin Speciale… aty s’ka kohë me u paraqit, se qenka shumë i zënë me “drejtësi selektive”! Luja Albin, luja… Luja popullit sa të mundesh!” , ka shkruar ai.
E këtyre reagimeve në rrjetet sociale iu është përgjigjur zëdhënësi i Qeverisë, Përparim Kryeziu.
“Sa i përket ftesës së Prokurorisë Speciale, kryeministri Kurti asnjëherë nuk ka refuzuar që të japë dëshminë e tij. Përkundrazi, ai ka shprehur gatishmërinë e plotë për të bashkëpunuar me drejtësinë dhe për të respektuar parimin e transparencës dhe llogaridhënies, duke kërkuar që intervistimi të zhvillohet në zyrën e tij, një praktikë kjo që ka ndodhur edhe më parë”, ka thënë Kryeziu.
Ai po ashtu ka thënë se për rastin e kanosjes, Kurti është intervistuar në zyrën e tij më 10 qershor.
Kurti ishte gjobitur nga Gjykata për mosparaqitjen e tij në Prokurori për rastin e rezervave shtetërore me gjobë 250 euroshe, për të cilën ai edhe ishte ankuar.
