Kadri Kryeziu, ish-nënkryetar i Gjykatës Kushtetuese të Kosovës, ka komentuar kërkesën e dorëzuar nga Presidentja Vjosa Osmani në Gjykatën Kushtetuese në emisionin “Këndi i Debatit” në Tëvë1. Ai tha se Presidentja është dashur të veprojë më herët dhe se pjesërisht ka vepruar drejt, por edhe ka gabuar rëndë në një segment të kërkesës së saj.
“Unë e kam përmend edhe më herët dhe ia kam thënë vetë Presidentes, madje në emisionin tuaj, se në momentin që shpallet aktgjykimi i Gjykatës Kushtetuese, ajo duhet menjëherë të dorëzojë një kërkesë për sqarim – për të ditur çfarë ndodh pas afatit 30-ditor,” tha Kryeziu.
Ai vlerësoi se pjesa e parë e kërkesës, që ka të bëjë me interpretimin e afatit dhe pasojave kushtetuese, është legjitime dhe e qëlluar, por shprehu kundërshtim të fuqishëm ndaj kërkesës për masë të përkohshme.
“Sa i përket kërkesës së dytë për pezullim, Presidentja ka gabuar totalisht. Gjykata Kushtetuese nuk merr masa të përkohshme për vendimet e veta – sepse kjo do të nënkuptonte një demolim të aktgjykimeve që vetë i ka marrë,” theksoi ai.
Kryeziu shtoi se Presidentja ka vepruar me vonesë të konsiderueshme, pasi është ditur paraprakisht që më 26 korrik përfundon mandati i Kuvendit.
“Ajo ka vonuar shumë. Ka qenë e njohur se më 26 korrik përfundon mandati i Parlamentit. Aktgjykimet e Gjykatës Kushtetuese shndërrohen në ligj, dhe ligji pastaj sjell pasoja: e para, është masa kushtetuese – që nënkupton marrjen ose heqjen e mandatit; dhe e dyta, është masa penale, sepse cenimi i rendit kushtetues mund të përbëjë vepër penale që rrezikon demokracinë dhe rendin juridik të Republikës së Kosovës,” përfundoi Kryeziu.
