Ish-mesfushori i Lyon, Juninho Pernambucano së fundmi sulmon ashpër trajnerin Rudi Garcia teknikun aktual të Al-Nassr, skuadra ku u transferua Cristiano Ronaldo. Braziliani i cili e ka njohur nga afër teknikun francez kur punonin së bashku tek Lyon, theksoi se francezi nuk di të menaxhojë një skuadër ndërsa shtoi se edhe tek Al-Nassr me Ronaldon, thjesht do të shndërrohet në një shërbëtor të luzitanit.
“Rudi Garcia nuk ka guximin që të bëjë ashtu si ai mendon, edhe tani me Ronaldon në skuadër ai do të kthehet në një shërbëtor të portugezit. Mund edhe t’i shërbejë mëngjesin. Ai nuk di të menaxhojë një skuadër dhe ai punon nga frika që i imponojnë të tjerët. Respekton vetëm personat që kanë forcë pushteti apo ata nga të cilët mund të përfitojë diçka.
Eksperienca ime me Rudi Garcian ishte e tmerrshme, është personi më i keq që kam njohur ndonjëherë. Edhe si trajner është shumë i dobët, ai është më shumë i përshtatshëm për skuadra mesatare apo të vogla. Njeh shumë pak nga ana teknike, hapësirat në fushë, inteligjenca që duhet të tregojë një skuadër në fushë apo edhe variatete të ndryshme të lojës”, u shpreh Juninho.
