Ish-ministrja e Punëve të Jashtme, Meliza Haradinaj-Stublla, ka kërkuar nga presidentja e Kosovës, Vjosa Osmani-Sadriu që ta telefonojnë urgjentisht homologun e saj kroat, Zoran Millanoviq, i cili kritikoi shtetet perëndimore për përdorim të standardeve të dyfishta në politikat ndërkombëtare, duke tërhequr paralele mes shpalljes së pavarësisë së Kosovës dhe aneksimit të Krimesë.
Haradinaj ka thënë se Osmani duhet të sqarojë dallimin mes rrugëtimit të pavarësimit legjitim të Kosovës dhe aneksimit të Krimesë nga Rusia.
Mes tjerash, Haradinaj kërkon që kjo të bëhet edhe përmes letrës zyrtare.
“Presidentja Vjosa Osmani duhet t’a telefonojë menjëherë nesër pres kroat, Zoran Millanoviq për t’ia shpjeguar atij dallimin esencial mes rrugëtimit të pavarësimit legjitim e legal të Kosovës & aneksimit ilegal të Krimesë. Po ashtu edhe me letër zyrtare referuar prononcimit skandaloz të tij”, shkroi ajo në Twitter.
Ndryshe, presidenti kroat Milanoviq tha se Rusia mund të përdorë, atë që e ai e quajti “aneksim të Kosovës” nga komuniteti ndërkombëtar si një justifikim për të marrë pjesë të territorit të Ukrainës.
“Ne e kemi njohur Kosovës kundër vullnetit të shtetit [të Serbisë], të cilit i takon Kosova”, tha ai, duke theksuar se ai nuk po vë në pikëpyetje pavarësinë e Kosovës – të shpallur më 2008 – por, konceptin e standardeve të dyfishta të Perëndimit.
“Rusët, nëse janë cinikë do t’i referohen Kosovës….Ne e aneksuam Kosovën. Ne dhe komuniteti ndërkombëtar. Ajo u mor nga Serbia. Kush e bëri këtë përveç nesh? Nuk është aneksim, është rrëmbim”, tha ai.
