Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media (KPM) dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”.
Në seancën përfundimtare të mbajtur të enjten, Prokurorja Merrushe LLugiqi, kërkoi që Bilalli të shpallet fajtor.
“Ne veprimet e tij, ekzistojnë të gjitha elementet e veprës penale, marrja e ryshfetit. Këtë vepër penale i pandehuri, A.B e ka kryer me dashje, duke qenë i vetëdijshëm për pasojat dhe duke pasur për qëllim që vetit t’i sjellë pasuri. Andaj prokuroria mbetet pranë aktakuzës dhe i propozon Gjykatës të njëjtin ta shpall fajtor, dhe t’i shqiptohet dënimin si në aktakuzë”, tha ajo, raporton Tëvë1.
Naim Rudari, avokati i Telkos, tha se nga veprimet e të pandehurit, kompanisë i janë shkaktuar dëme të mëdha dhe ka kërkuar që i akuzuari të shpallet fajtor.
“E mbështesim fjalën e Prokurores së shtetit, dhe në këtë rast kërkojmë nga Gjykata që në rastin e caktimit të dënimit për të akuzuarin, të ketë parasysh të gjitha rrethanat rënduese, siç është shkalla e lartë e pjesëmarrjes të personit në veprën penale, shkallën e lartë të dashjes në veprën penale, edhe pse gjatë takimeve me njërin nga pronarët e Telkos, Elhami Haziri, Elhamiu ia përkujton disa herë që jemi duke bërë punë të keqe dhe rrethana të tjera që do ta ndalonin kryerjen e veprës penale, por i njëjti insiston në kryerjen e veprës penale. Po ashtu si rrethanë rënduese, mosha e kryerjes së veprës penale, që është mosha e pjekurisë, si dhe shkallën e dënimit të shkaktuar te pala e dëmtuar, kompania Telkos, si shpërndarës së rrjetit me internet dhe TV, ka pësuar humbje të madhe kur përnjëherë i kanë ndërprerë sinjalin disa televizione dhe më pas janë obliguar të vrapojnë pas obstruksioneve të parashtruara nga kryeshefi i KPM-së, dhe drejtori tani i akuzuar. Me këtë rast kërkojmë që të njëjtit t’i shqiptojnë dënimin sipas politikës ndëshkimore të paraparë me ligj”, ka thënë avokati Rudari.
Florent Latifaj, avokati i Arben Billallit, kërkoi që ndaj klientit të tij të kihet parasysh rrethanat lehtësuese të dënimit.
“I njëjti ka qenë bashkëpunues me organet, duke pranuar të gjitha veprimet e tij, si dhe inkriminim e tij në veprën penale. Të gjitha këto rrethana të parapara me nenin 70 paragrafin 3, të cilat me doemos ndikojnë në zbutjen e dënimit, e në rastin konkret kur kemi për bazë edhe faktin se nuk ka të kaluar kriminale dhe nuk zhvillohet ndonjë procedurë penale kundër tij, si dhe faktin se i njëjti kësaj Gjykate i ka dorëzuar një dokumentacion voluminoz për gjendjen e tij të rënduar shëndetësore dhe rekomandimet e mjekëve, dënimi të ulet nën minimumin ligjor, duke aplikuar dispozitat e zbutjes së dënimit”, tha ai.
Arben Billalli gjatë seancës ka pranuar fajësinë.
Ndërsa,Luan Latifi, ish-kryeshef i Komisionit të Pavarur për Media(KPM), është deklaruar i pafajshëm në seancën e kaluar. Seanca ndaj tij do të mbahet në muajin tetor.
Gjykata Themelore në Prishtinë më 2 nëntor 2021, e kishte konfirmuar aktakuzën ndaj dy të akuzuarve, duke e refuzuar si të pabazuar kërkesën për hudhje të aktakuzës ndaj të akuzuarit Latifi dhe po ashtu kishte ndërprerë masën e arrestit shtëpiak ndaj tij dhe të akuzuarit Bilalli.
Ndërsa, pas ankesës së avokatit Musliu, Gjykata e Apelit ka anuluar vendimin e shkallës së parë, me të cilën ishte konfirmuar aktakuza për korrupsion ndaj të akuzuarit Latifi dhe e kishte kthyer çështjen në rivendosje.
Pas kthimit në rivendosje nga Gjykata e Apelit më 17 nëntor 2021, Gjykata Themelore në Prishtinë më 2 dhjetor 2021 ka refuzuar si të pabazuar kërkesën për hudhje të aktakuzës të ushtruar nga mbrojtësi i të pandehurit Latifi dhe më pas më 23 dhjetor 2021, Apeli ka vërtetuar vendimin e shkallës së parë për konfirmim të aktakuzës.
Aktakuza e ngritur më 15 shtator 2021, ngarkon Luan Latifin se në cilësinë e kryeshefit të Komisionit të Pavarur për Media (KPM) dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”.
Në aktakuzë thuhet se ky ryshfet ishte pranuar nga ana e të akuzuarve me qëllim që kompanisë “Telkos”, të mos i shqiptohet gjobë për shkak se e njëjta kishte bërë shkelje ligjore duke bërë shtrirje të rrjetit në disa vende për të cilat nuk e kishte njoftuar KPM-në.
Sipas aktakuzës, Bilalli më 24 qershor 2021, ishte takuar në zyrën e tij me pronarët e kësaj kompanie, Elhami Haziri, Enver Berisha dhe Ymer Kurtolli, të cilëve iu kishte kërkuar 20 mijë euro ryshfet, duke iu thënë se këtë shumë të parave po e kërkonte i akuzuari Latifi.
Por, pasi i dëmtuari Haziri i kishte thënë që nuk e kishte këtë shumë, të njëjtit kishin arritur të merren vesh që për fillim të japin 10 mijë euro, ku në atë moment sipas prokurorisë, i akuzuari Bilalli i kishte shkruar të akuzuari Latifi “nuk po lëshon veç 10”, dhe më pas më 29 qershor 2021, i akuzuari Bilalli ishte takuar me të dëmtuarin Haziri.
Sipas prokurorisë, të dy ishin takuar në restorant “Garden”, në Gjilan, dhe pasi i dëmtuari Haziri i kishte dhënë 8 mijë euro, kishte kërkuar nga i akuzuari Bilalli të kontaktojë të akuzuarin Latifi për tu bindur se ky i fundit e kishte marrë vesh se paratë janë dhënë.
Pas kësaj, prokuroria po pretendon se duke u zbatuar masat e fshehta dhe nën vëzhgim të policisë, i akuzuari Bilalli në prezencë të të dëmtuarit Haziri i kishte telefonuar të akuzuarit Latifi duke i thënë “kreva punë dhe tash po eci”.
Sipas aktakuzës, i akuzuari Bilalli shumën prej 8 mijë euro e kishte pranuar në një zarf dhe ishte nisur në drejtim të Prishtinës, ku rrugës ishte ndaluar nga policia të cilët ia kishin gjetur shumën prej 8 mijë euro dhe ia kishin sekuestruar./Teve1.info/
Lexo edhe
https://teve1.info/lajmet/ish-kryeshefi-i-kpm-se-deklarohet-i-pafajshem-ndersa-ish-drejtori-e-pranon-fajesine-per-marrje-ryshfeti2/?fbclid=IwAR1ByZgYLqfeha21lobrlYlszX47KU57hxMpm57RAR5dULdpt70i9KqXwX0