Ish-aktivisti i Vetëvendosjes, Naim Ramizi ka folur për protestën e vitit 2007 ku u vranë Mon Balaj e Arben Xheladini.
Ramizi tha se që nga ajo kohë shumë pak gjëra kanë ndryshuar.
“Që nga atëherë kanë kaluar 16 vite dhe pak gjëra thuajse kanë ndryshuar. Pavarësia e Kosovës është elementi që e karakterizon atë ndryshim, përndryshe gjërat tjera sa i përket sferës politike pak a shumë janë të ngjashme duke e pas parasysh kërkesën, trysninë ndërkombëtare për themelimin e Asociacionit, mendoj se në sferën politike Kosova thuajse nuk dallon shumë prej asaj kohe”, ka thënë ai.
Sipas tij, LVV-ja nuk posedon asnjë trashëgimi nga e kaluara e saj.
“Vazhdoj ta them se Vetëvendosja nuk posedon asnjë trashëgimi nga e kaluara e saj, nga kauza në të cilat ka qenë atëherë”, ka deklaruar ai në emisionin “Ditari” në Tëvë1.
Po ashtu, Ramizi u pyet se çfarë e bën shumë të dalluar Vetëvendosjen në pushtet me atë sa ishte në opozitë, ai u përgjigj nepotizmi, meritokracia e keqpërdorimet, teksa shtoi se Vetëvendosja nuk dallon aspak nga partitë që kanë qeverisur më parë.
“Nepotizmi, barazia sociale, meritokracia, keqpërdorimet shumë gjëra tjera. Vetëvendosja nuk dallon aspak nga partitë të cilat kanë qeverisur më herët e për të cilat VV ka qenë kritikuese jashtëzakonisht e madhe”, përfundoi ai. /Teve1.info/
