Selektori i Irlandës, Heimir Hallgrimsson, të mërkurën paradite ka folur në konferencën për shtyp para ndeshjes me Kosovën.
Irlanda përballet me Kosovën në duelin e parë të sezonit të ri të Ligës së Kombeve, i cili i takon ligës B të kësaj gare.
Ndeshja Kosovë – Irlandë, luhet të enjten nga ora 20:45 në stadiumin “Fadil Vokrri” në Prishtinë dhe i takon grupit 3, të cilin e përbëjnë edhe Austria e Izraeli.
Selektori i Irlandës, ka vlerësuar lart Kosovën në prag të përballjes, duke shtuar se është i impresionuar me rritjen e “Dardanëve”, të cilët tani renditen në pozitën e 78 në ranglistën e FIFA-s.
Po ashtu, Hallgrimsson ka pranuar se do të ishte i kënaqur me një barazim në Prishtinë pasi ndeshjen me Kosovën e sheh si tejet të vështirë.
Në fund, ai ka paralajmëruar ekipin e tij që të ketë kujdes nga sulmuesi i Kosovës, Vedat Muriqi, të cilin e sheh si kërcënimin kryesor për Irlandën.
Edhe futbollisti irlandez, Dara O’Shea pret një ndeshje të fortë ndaj Kosovës, kundërshtar që ka thënë se ka një ekip të shkëlqyer.
