Televizioni shtetëror iranian raportoi se Teherani ka siguruar një draft fillestar dhe jozyrtar të një memorandumi mirëkuptimi me Shtetet e Bashkuara, që synon t’i japë fund luftës mes dy vendeve.
Sipas raportimeve, dokumenti parashikon që Irani të rikthejë trafikun tregtar në Ngushticën e Hormuzit në nivelet para luftës brenda një muaji, ndërsa SHBA-ja do të tërhiqte forcat ushtarake nga afërsia e Iranit dhe do të hiqte bllokadën detare.
Media shtetërore iraniane theksoi se anijet ushtarake amerikane nuk përfshihen në marrëveshjen e propozuar për Hormuzin.
Sipas raportit, trafiku detar në ngushticë do të menaxhohej nga Irani në koordinim me Omanin.
Raporti shtoi se dokumenti mbetet paraprak dhe se Teherani nuk do të ecë përpara pa “verifikim të prekshëm”.
Ndërkohë, agjencia iraniane e lajmeve Mizan publikoi detaje të tjera mbi propozimin për nisjen e një procesi shumëpalësh paqeje.
“Amerika është zotuar të tërheqë forcat e saj ushtarake nga zonat përreth Iranit, megjithëse mbetet për t’u negociuar nëse kjo përfshin forcat e dislokuara në rajon apo ato të vendosura në baza ushtarake”, thuhet në raport.
“Nëse arrihet një marrëveshje përfundimtare brenda një periudhe 60-ditore, ajo do të miratohet në formën e një rezolute detyruese të Këshillit të Sigurimit të OKB-së”, shtoi media iraniane.
Në të njëjtën kohë, Ali Bagheri Kani, zëvendëssekretar i Këshillit Suprem të Sigurisë Kombëtare të Iranit, ritheksoi se çështja e uraniumit të pasuruar mbetet jashtë negociatave aktuale me SHBA-në.
“Kjo çështje nuk është në agjendën e negociatave”, deklaroi Bagheri Kani për agjencinë Fars gjatë një konference ndërkombëtare sigurie në Moskë.
Presidenti amerikan, Donald Trump, ka deklaruar se SHBA-ja nuk do të lejojë Iranin të mbajë rezervën prej 440 kilogramësh uranium të pasuruar në nivele të larta.
E ardhmja e uraniumit të pasuruar në nivelin 60 për qind mbetet një nga pikat kryesore të mosmarrëveshjes në negociatat mes Uashingtonit dhe Teheranit./teve1.info/
