Inspektorati Policor i Kosovës (IPK) ka rekomanduar suspendimin e dy zyrtarëve policorë të Drejtorisë Rajonale të Policisë në Mitrovicën e Veriut, të cilët dyshohen për përfshirje në një rast të tejkalimit të autorizimeve policore gjatë një operacioni në Dren të Zubin Potokut.
Sipas IPK-së, hetimi paraprak ka nisur disa ditë më parë, sipas detyrës zyrtare, pas raportimeve mediale dhe deklaratave publike të 11 gushtit 2026 lidhur me pretendimet e qytetarit me inicialet N. R. ndaj disa pjesëtarëve të Policisë së Kosovës.
Pas ndërmarrjes së disa veprimeve hetimore, IPK-ja ka vlerësuar se ekziston dyshimi se dy zyrtarët policorë janë të përfshirë në veprën penale “Keqtrajtim gjatë ushtrimit të detyrës zyrtare ose autorizimeve publike”.
Hetimi është duke u zhvilluar me qëllim të verifikimit të pretendimeve dhe sqarimit të plotë të fakteve dhe rrethanave që lidhen me veprimet e zyrtarëve policorë gjatë operacionit të zhvilluar në Dren.
IPK ka bërë të ditur se hetimet nuk paragjykojnë rezultatin përfundimtar të rastit.
Departamenti i Hetimeve do të vazhdojë ndërmarrjen e veprimeve hetimore në bashkëpunim me Prokurorinë Themelore në Mitrovicë.
Në kuadër të procedurës pritet të mblidhen dhe vlerësohen dokumentacioni dhe informacionet zyrtare, si dhe të intervistohen persona që mund të kenë njohuri lidhur me incidentin.
IPK ka theksuar se çdo ankesë apo informacion që lidhet me sjelljen e zyrtarëve policorë trajtohet me seriozitet dhe brenda kompetencave ligjore të institucionit./teve1.info/
