Përmes aeroportit të Shkupit, të enjten planifikoi të udhëtojë jashtë vendit.
Por, presidentja e Kosovës, Vjosa Osmani, u përballë me një incident tek pjesa e kontrolleve, ani pse po kalonte përmes zonës VIP.
Personeli i aeroportit, tentoi t’ia merrte telefonin personal, madje edhe duke u shtyr fizikisht, për çka ka sipas Presidencës, ka ndërhyrë Policia e Kosovës.
“Në kundërshtim me praktikat ndërkombëtare dhe Konventën e Vjenës për Marrëdhënie Diplomatike, sigurimi i Aeroportit të Shkupit ka tentuar ta marrë telefonin personal të Presidentes. Presidentja nuk ka lejuar një gjë të tillë, sepse do të ishte shkelje e rëndë. Përkundër shpjegimit të rregullave qe ekipi i Presidentes ia ka bërë të ditur zyrtarit të aeroportit, ai ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën”, ka thënë Bekim Kupina, këshilltar për media në Presidencë.
Këtë e mohon Aeroporti i Shkupit.
“Ne i hedhim poshtë kategorikisht akuzat se punonjësi ynë nga departamenti i sigurisë ka tentuar të marrë telefonin. Telefoni i është kërkuar për t’iu nënshtruar kontrollit të detyrueshëm të sigurisë përmes aparatit me rëntgen. Konventa e Vjenës për Marrëdhënie Diplomatike i përjashton nga kontrolli i sigurisë vetëm mysafirët zyrtarë të Qeverisë së Republikës së Maqedonisë së Veriut dhe operatori i aeroportit merr njoftim zyrtar për përjashtime të tilla nga Ministria e Punëve të Brendshme”, thuhet në komunikatën e Aeroportit të Shkupit.
I gjithë koordinimi i udhëtimit të një kreu të shtetit, sipas protokollit bëhet përmes ambasadave, të cilat kryejnë procedurat që vijnë deri tek mënjanimi i kontrolleve.
“Ambasada pastaj i kryen ato procedurat protokolare, e informon Ministrinë e Jashtme të shtetit tranzit që presidentja në orën kaq, do të udhëtojë në këtë destinacion dhe kërkon përkrahje nga shteti pritës, që në kushte normale do duhej t’i sigurohej. Dhe pastaj do ta kalonte pa ndonjë check – kontroll”, ka thënë ish-diplomati, Blerim Canaj.
Një rast i tillë, në Maqedoni të Veriut, vlerësohet me potencial edhe për prishje raportesh mes të dyja vendeve.
„Këto incidente mund të ndikojnë edhe në prishjen e raporteve mes të dyja vendeve fqinje, që nuk është mirë për shkak të ndonjë individi të papërgjegjshëm të ndodhin gjëra të tilla. Këtu e përjashtoj Qeverinë dhe shtetin, dhe komplet faji është i kompanisë TAV nga Turqia, e cila duhet të kujdeset për zbatimin e protokolit dhe personave shtetërorë“, ka thënë analisti në Maqedoni të Veriut, Zudi Xhelili.
Për këtë incident, Presidenca ka njoftuar kryetarin e Kuvendit të Maqedonisë së Veriut, Afrim Gashi, i cili sipas Presidencës ka ofruar ndihmë.
Nga partitë shqiptare në Maqedoni të Veriut, ngjarja e së enjtes, u quajt incident skandaloz diplomatik.
Kurse, MPJD ka thënë se janë duke mbledhur informata për atë se çfarë ndodhi saktësisht.
