Një incident me armë zjarri dyshohet se ka ndodhur rreth orës 18:00 në rrugën Gjilan–Kamenicë, në afërsi të një pike karburanti.
Zëdhënësi i Policisë së Gjilanit, Ismet Hashani, ka bërë të ditur se njësitet policore kanë dalë menjëherë në vendngjarje dhe kanë sekuestruar prova materiale që lidhen me rastin.
Sipas informacioneve fillestare, dyshohet se në incident kanë qenë të përfshira dy automjete në lëvizje.
Si pasojë e ngjarjes, një person ka kërkuar ndihmë mjekësore në Spitalin Rajonal të Gjilanit dhe po trajtohet nga autoritetet shëndetësore.
“Policia e Kosovës, në koordinim me Prokurorin e Shtetit, është duke ndërmarrë veprimet e nevojshme hetimore dhe është në kërkim të personave të dyshuar lidhur me këtë rast”, ka thënë Hashani.
