Sakrifica për veprën e tyre vlerësohet lartë.
E kjo u dëshmua edhe me ngritjen e një lapidari të Naser Hajrizit e Asllan Pirevës në përvjetorin e vdekjes së tyre.
Emrat e dy dëshmorëve të parë të kryengritjes së vitit 1981, tani do të qëndrojnë përjetësisht në vendin ku ranë heroikisht.
44 vjet më parë të dy u vranë në ballë të demonstratës, prapa monumentit të Skënderbeut, në Prishtinë.
Fazli Veliu, ish-kryetari i Lëvizjes Popullore të Kosovës, tha se dëshmorët Hajrizi dhe Pireva, me veprën e tyre treguan shembullin se si mbrohet atdheu.
“Për dy faktorë këta dy djem ranë këtu, një ishte atdhedashuria, që e kanë dashur ata deri në Sarandë, edhe me Ulqinin dhe hapësirën shqiptare. E dyta ishte domosdoshmëria për t’u vetëmbrojtur, nuk kishte tjetër rrugë dalje. Si njëri dhe tjetri zgjodhën rrugën e betimit të madh të vdesin për lirinë, rrugën e madhe liri a vdekje. Janë të pabarabartë në hapësirën shqiptare këta dy djem, dhe të gjithë ata që bënë historinë e lavdishme të asaj kohe”, tha Fazli Veliu, ish-kryetar i LPK-së.
E disa fjalë i tha edhe kryetari i shoqatës së burgosurve politik, Shefik Sadiku.
“U tërbua politika jugosllave në krye të cilës qëndronte kryesia e RSFJ-së, përgjegjëse për të gjitha krimet bashkë me komitetet qendrore të lidhjes komuniste jugosllave. Fashizmi dhe racizmi ishte pikërisht tek ata, ndërsa populli shqiptar luftonte kërkonte rrugën e lirisë. Këta demonstrues dhe masa që ishin në këtë vend i tërboi pushtuesit dhe i goditën, dhe i vranë edhe Naser Hajrizin dhe Asllan Pireven. Prandaj, ne me përkushtim të madh i nderojmë jo vetëm këta, por edhe shokët e tyre të cilët u vranë në të njëjtën ditë”, tha ai.
Aty nuk mungoi edhe vëllai i dëshmorit Naser Hajrizi, Bujari.
“Vendin më meritor e zënë dëshmorët, sepse ata dhanë gjithçka nga vetja e tyre, duke mos kursyer as jetën. Dashuria ndaj atdheut matet me sakrificë, dhe në emër të kësaj dashurie ata bënë sakrificë sublime. Ata u brumosën dhe u ushqyen me ndjenjat patriotike duke formuar karakterin luftarak dhe çlirimtar, ata mëshironin shpirtin kryengritës të përcjellë nga brezat e shumtë të traditës së lëvizjes shqiptare. Dëshmorët e dinin se lufta drejt lirisë ishte e vështirë dhe me plot sakrifica, por ishin të bindur në përfundimin fitimtar të saj”, tha ai.
Krejt në fund, familjarët e dëshmorëve të çështjes kombëtare morën edhe dhurata.
