Imami në Xhaminë e Tregtarëve në Fushë-Kosovë, Avdyl Rrahmani u ka bërë thirrje kompanive që të paguhet djersa e punëtorit dhe të mos neglizhohet puna e tij.
Rrahmani, ka treguar që Pejgamberi Muhamed ka porositur në mënyrë direkte që nuk guxon të vonohet pagesa për punëtorët.
“Pejgamberi këtë na e thotë në mënyrë direkte nuk guxon që të teret (thahet) djersa e punëtorit e ti të mos ia jepesh hakun atij. Këtu ju bëj thirrje kompanive që neglizhojnë çështjen e pagave, sepse punëtori tek e fundit e pret pagën në fund të muajit, ti ndoshta i ke qarkullimet milionëshe, po atë që e bëjnë me ushqy familjen e punëtorit është varja e tij prej rrogës që ti ia ofron. Pra nuk guxon me u tha djersa e tij”, ka thënë imami në emisionin “Fanari” në Tëvë1.
Sipas tij, kjo nënkupton që nuk guxon të vonohet rroga, në qoftë se kjo ndodh atëherë bereqeti në atë punë pakësohet.
“Kjo nënkupton, që nuk guxon me u vonua rroga. E unë shoh nëpër kompani që rrogën e dhurojnë me tri rata. Nëse nuk je i zoti me i mbajt ata punëtorë, një zgjidhje duhet me ia bë, sepse ata varen prej rrogës tënde. Mandej, nuk do të kishte bereqet në punën tënde. Gjithsesi këtu ju bëj thirrje të gjithë kompanive të mëdha që të mos e neglizhojnë hakun e punëtorit, sepse kjo nënkupton që bereqeti pakësohet në punë”, tha mes tjerash Rrahmani.
