Kryetari i Komunës së Zveçanit, Ilir Peci, ka dhënë detaje mbi përballjen me sfidat e qeverisjes në komunën veriore, duke përshkruar situatat kritike që ka përjetuar gjatë marrjes së detyrës dhe rikthimit në zyrë pas sulmit në Banjska.
Peci tregoi që me sfida e vështirësi të mëdha është ballafaquar qysh në momentin kur është betuar si kryetar.
Ai ka treguar se me sfidat me të cilat është ballafaquar për të hyrë brenda në objektin e Komunës ka qenë i rrezikuar vetë ai, por edhe policët.
“Jashtë objektit të Komunës ka pasur një numër të madh qytetarësh serbë që nuk na lejonin të hynim. Kam tentuar të hy edhe me forcat e Policisë së Kosovës, por dyert kanë qenë të mbyllura për rreth 3 orë e gjysmë. Kur më në fund u hap hapësira për të hyrë brenda, gjendja ishte e rëndë – tym, objekte të shkatërruara dhe fotografi provokuese të kriminelëve, presidentëve serb e rus”.
Tutje, ai tregoi edhe se si erdhe deri te vendimi për të kaluar te zyrat alternative.
“Të nesërmen jam lajmëruar nga ministri Krasniqi në orën 04:00 të mëngjesit se do të më dërgojnë prapë në zyre. Ram dakord edhe pse nuk mu duk normale. Por, s’doja t’i ikja përgjegjësisë. Atë ditë mora telefonatë edhe nga ambasadori amerikan ku më ftoi në takim. Ai takim nuk ishte i lehtë, zgjati rreth 1 orë e 40 minuta. Mirëpo, në përfundim ramë në dakord që çdo hap që ndërmarrim të ishim të informuar nga ambasadorët amerikanë, hapi i parë ishte dërgimi në zyrat alternative”, tha ai.
Në zyrat alternative, Peci tha se kanë nisur punën nga zero, pasi që s’kanë pasur asnjë informatë të vetme për procedurat që janë realizuar në Zveçan.
“Kemi vazhduar në ato zyra, sfida e parë ka qenë që s’kemi pasur pranim e dorëzim. Filluan nga zero, s’kishim informacione se ku kanë mbetur procedurat, çka është në proces e çfarë duhet të vazhdojmë. Mirëpo, për disa muaj filluam disa punime, disa takime me qytetarë, por ndodhi sulmi në Banjska dhe mua më ktheu prapë në pikën ku isha. Aspak s’ka qenë e lehtë, pas shtat muaj, prapë jam kthyer në objektin e Komunës së Zveçanit”, tregoi Peci./teve1.info/
