Instituti Kombëtar i Shëndetësisë Publike të Kosovës ka njoftuar se nga 16 prilli deri më 12 maj 2026 janë konfirmuar gjithsej 14 raste me fruth në Kosovë.
Sipas të dhënave të publikuara, numri më i madh i rasteve është regjistruar në Ferizaj me pesë raste, pasuar nga Prishtina dhe Kaçaniku me nga tre raste, ndërsa nga një rast është raportuar në Lipjan, Fushë Kosovë dhe Gjilan.
IKSHPK bëri të ditur se të gjithë personat e prekur kanë qenë të pavaksinuar me vaksinën MMR kundër fruthit, shytave dhe rubellës, ndërsa të gjithë kanë pasur nevojë për trajtim spitalor.
Instituti ka apeluar tek prindërit që të kontrollojnë kartelat e vaksinimit të fëmijëve dhe të sigurohen që ata të vaksinohen në qendrat e mjekësisë familjare në komunat përkatëse.
Po ashtu, qytetarëve u është rekomanduar të shmangin kontaktet me persona që shfaqin simptoma si temperaturë të lartë, skuqje në lëkurë, kollë apo rrufë, ndërsa personat me shenja të dyshimta duhet të kërkojnë menjëherë ndihmë mjekësore.
IKSHPK ka theksuar se institucionet shëndetësore janë në gatishmëri të plotë dhe po monitorojnë situatën epidemiologjike, duke ndërmarrë masa konkrete në terren, përfshirë identifikimin e fëmijëve të pavaksinuar dhe organizimin e ekipeve mobile për vaksinim në komunitet.
Sipas IKSHPK-së, vaksinimi mbetet mënyra më e sigurt dhe më efektive për parandalimin e fruthit dhe mbrojtjen e shëndetit publik./teve1.info/
