Instituti Kombëtar i Shëndetësisë Publike të Kosovës (IKSHPK) ka bërë thirrje për kujdes të shtuar gjatë ditëve me temperatura të larta, duke u rekomanduar qytetarëve të respektojnë masat parandaluese për të shmangur pasojat që mund të shkaktojë vapa.
Në njoftimin e publikuar në Facebook, Instituti thekson rëndësinë e konsumimit të ujit në mënyrë të rregullt për të parandaluar dehidratimin, ndërsa këshillon që gjatë kësaj periudhe të preferohen ushqimet e lehta dhe të freskëta.
Po ashtu, rekomandohet shmangia e pijeve alkoolike dhe atyre me përmbajtje të lartë sheqeri, pasi ato mund të ndikojnë negativisht në hidratimin e organizmit.
IKSHPK-ja u sugjeron qytetarëve të veshin rroba të lehta, me ngjyra të çelëta, si dhe të freskojnë trupin me ujë, në mënyrë që të përballojnë më lehtë temperaturat e larta.
“Gjatë temperaturave të ngritura është me rëndësi që të kujdeseni për veten tuaj. Pini ujë shpesh, hani ushqime të lehta e të freskëta, shmangni pijet alkoolike dhe ato me sheqer, vishuni me rroba të lehta dhe freskoni trupin me ujë”, thuhet në njoftimin e IKSHPK-së.
