Migrimi i të rinjve dhe profesionistëve vlerësohet si kërcënimi më i lartë i sigurisë publike në Kosovë.
Këto të dhëna kanë dalë nga raporti i dytë i Barometrit të Sigurisë në Ballkanin Perëndimor për vitin 2022 lidhur me perceptimet e qytetarëve për Sigurinë Publike dhe Kërcënimet ndaj Sigurisë Kombëtare, të publikuar nga Qendra Kosovare për Studime të Sigurisë (QKSS).
Sipas të dhënave të raportit 83% e të anketuarave migrimin e shohin si kërcënim apo kërcënim të lartë në komunitetet e tyre.
“Migrimi i të rinjve dhe profesionistëve (largimi i trurit) renditet si kërcënimi më i lartë për sigurinë publike, të cilin 83 përqind të të anketuarve e shohin si kërcënim ose kërcënim të lartë për komunitetet e tyre përkatëse. Kafshët endacake dhe abuzimi me drogën perceptohen gjithashtu si fenomene shumë kërcënuese. Për më shumë, të anketuarit përgjithësisht shqetësohen për mungesat e gjërave esenciale, por shqetësimet më të mëdha i shprehin për mungesën e energjisë elektrike”, thuhet në komunikatën e QKSS.
Më tutje sa i përket sigurisë publike, të anketuarit përgjithësisht ndihen të sigurt në komunitetet e tyre të ngushta.
“Ndjenja e sigurisë gradualisht zvogëlohet ndërsa komunitetet rriten. Rreth 77% e të anketuarve deklaruan se ndihen të sigurt në shtëpitë e tyre, ndërsa ndihen më pak të sigurt në shtetin e tyre (rreth 33%). Perceptimet e të anketuarve midis viteve 2021 dhe 2022 tregojnë një rënie të vogël të ndjenjës së sigurisë publike; në BSBP-në e mëparshme më 2021, ishin respektivisht 79 përqind dhe 40 përqind e të anketuarve që deklaruan se ndjeheshin të sigurt në shtëpitë e tyre dhe në shtetin e tyre. Pothuajse gjysma e të anketuarve ndihen të sigurt në hapësirën kibernetike”, thuhet në komunikatë.
Në nivel të sigurisë kombëtare, të anketuarit i shohin çmimet e rritura të mallrave si kërcënimin më të lartë ndaj sigurisë kombëtare të Kosovës, pasuar nga kriza energjetike. Ndotja dhe ndryshimet klimatike, ekstremizmi i dhunshëm dhe COVID-19 shihen si kërcënimet më të ulëta për sigurinë kombëtare.
Në nënkapitullin për Dhunën në Familje, sipas të dhënave të anketës, shkaqet kryesore të dhunës në familje në Kosovë janë kushtet e këqija ekonomike dhe niveli i ulët arsimor. Të anketuarit besojnë se ngritja e cilësisë së arsimit, dhe organizimi i më shumë fushatave vetëdijësuese janë disa nga masat që duhet të ndërmerren nga institucionet për parandalimin dhe luftimin e dhunës në familje.
