Instituti i Kosovës për Drejtësi (IKD) ka njoftuar se Komisioni Qendror i Zgjedhjeve ka refuzuar kërkesën e tyre për akreditimin e vëzhguesve për zgjedhjet parlamentare të 28 dhjetorit 2025.
IKD e ka cilësuar këtë vendim si “arbitrar” dhe të pabazuar në arsyetim ligjor.
Sipas institutit, njoftimi i pranuar nga Zyra për Regjistrim, Certifikim dhe Kontroll Financiar të Subjekteve Politike nuk përmban sqarime të detajuara, mungon baza ligjore dhe nuk ofron as këshillë juridike se si mund të kontestohet vendimi.
IKD thotë se kjo bie ndesh me parimet e transparencës dhe të drejtës për mbrojtje juridike.
IKD pretendon se vendimi cenon rolin e organizatave joqeveritare në monitorimin e zgjedhjeve dhe se interpretimi i KQZ-së, sipas të cilit IKD “nuk i plotëson kriteret” për akreditim, është i gabuar dhe selektiv.
Sipas tyre, misioni i IKD-së në fushat e sundimit të ligjit, transparencës, llogaridhënies dhe monitorimit institucional është drejtpërdrejt i lidhur me proceset zgjedhore dhe standardet demokratike.
Instituti kritikon gjithashtu se Zyra e KQZ-së ka tejkaluar kompetencat duke marrë vetë vendim për refuzimin e aplikimit, ndonëse rregullorja parasheh që vendimmarrja finale i takon KQZ-së dhe jo kësaj zyre.
IKD paralajmëron se do të shfrytëzojë të gjitha mjetet ligjore për të kundërshtuar vendimin dhe i bën thirrje KQZ-së të rishqyrtojë praktikat e saj, duke theksuar se veprimet e tilla dëmtojnë transparencën, integritetin e zgjedhjeve dhe rolin e shoqërisë civile në proceset demokratike.
“Vendimi i Zyrës së KQZ-së jo vetëm që keqintepreton Ligjin per Zgjedhjet por edhe shkel standardet ndërkombëtare. Praktikat ndërkombëtare të OSBE/ODIHR, Këshillit të Evropës dhe standardet e demokracive perëndimore e njohin rolin e organizatave të shoqërisë civile në vëzhgimin e zgjedhjeve bazuar në misionin e tyre për transparencë, llogaridhënie dhe interes publik, jo vetëm nëse kanë të shkruar fjalën ‘zgjedhje’ apo ‘drejtat e njeriut’ në statut”, thuhet në komunikatë. /teve1.info/
