Policia e Kosovës ka identifikuar dhe arrestuar një person të dyshuar për përfshirje në një aksident trafiku dhe largim nga vendi i ngjarjes.
Sipas njoftimit të policisë, zyrtarët e Stacionit Policor në Zveçan, më 1 qershor 2026, kanë arritur të identifikojnë dhe arrestojnë një person që dyshohet se ishte përfshirë në një aksident trafiku të ndodhur më 30 maj 2026.
Bazuar në hetimet e zhvilluara, i dyshuari kishte goditur një automjet me targa të huaja, i cili ishte i parkuar në rrugën “Obiliqeva”, dhe më pas ishte larguar nga vendi i ngjarjes në drejtim të panjohur.
“Falë bashkëpunimit të qytetarëve me Policinë dhe punës hetimore të zyrtarëve policorë, është arritur identifikimi i personit të dyshuar me inicialet S.S. (1970). I njëjti është lokalizuar dhe arrestuar në Zveçan”, thuhet në njoftim.
Lidhur me rastin janë ndërmarrë të gjitha veprimet e nevojshme procedurale, ndërsa pas intervistimit, i dyshuari është liruar në procedurë të rregullt.
“Policia mbetet e përkushtuar në ruajtjen e rendit dhe sigurisë publike, si dhe në ofrimin e shërbimeve për të gjithë qytetarët pa dallim”, theksohet në fund të njoftimit./teve1.info/
