Dy vozitës të automjeteve BMW X5, njëri me ngjyrë të kuqe dhe tjetri me ngjyrë të zezë, me targa vendore, janë identifikuar duke kryer kundërvajtje të rënda në komunikacion, në kundërshtim me për Rregullat e Trafikut Rrugor.
Sipas Policisë, njëri nga vozitësit ka lëvizur në shiritin e kundërt të qarkullimit dhe nuk është ndalur në semaforin me dritë të kuqe, ndërsa vozitësi tjetër ka kryer tejkalim në vijë të plotë pranë vendkalimit për këmbësorë, afër rrethrrotullimit, duke rrezikuar pjesëmarrësit e tjerë në trafik.
Këto shkelje janë identifikuar dhe dokumentuar përmes kamerave të sigurisë të vendosura në qytet.
Njësiti Rajonal i Komunikacionit Rrugor në Gjilan ka reaguar menjëherë duke ndërmarrë veprimet operative të nevojshme.
Pas identifikimit të vozitësve, ndaj tyre janë shqiptuar gjoba në përputhje me legjislacionin në fuqi.
Drejtoria Rajonale e Policisë në Gjilan ka apeluar tek të gjithë ngasësit që të respektojnë rregullat e trafikut, të përshtatin shpejtësinë dhe mënyrën e ngasjes me kushtet e rrugës, me qëllim të parandalimit të aksidenteve dhe rritjes së sigurisë në komunikacion.
“Siguria në trafik është përgjegjësi e përbashkët dhe kërkon angazhimin e të gjithëve”, thuhet në apelin e policisë.
