Madje sipas Ibrahimit, Ministria e Financave nuk ka vepruar asgjë lidhur me ankesat e komunave.
“Kur është dërguar dokumenti nga Ministria e Financave te Komunat, ka pasur reagim të komunave. Kemi pasur reagim nga Komuna e Kaçanikut, Gjakovës e të tjera. Mirëpo, ankesat të cilat janë dërguar nga komunat te Ministria e Financave, është vlerësuar që ky rivlerësim nuk ka qenë objektiv, e kjo sipas përfaqësuesve të komunave. Ministria e Financave nuk ka ndërmarrë asnjë hap që t’i shqyrtojë ankesat e tyre. Në kuadër të asociacionit ekzistojnë kolegjiumet tona profesionale, një ndër ta është edhe kolegjiumi i drejtorëve komunalë të financave, ku ata në takimet e tyre debatojnë sa i përket këtyre çështjeve”, u shpreh Ibrahimi në emisionin “Këndi i Debatit”.
Njëherit, Ibrahimi bëri të ditur se duke parë se Ministria e Financave nuk i mori për bazë ankesat e komunave, atëherë edhe komunat tjera nuk kanë dërguar ankesat e tyre.
“Është parë që niveli qendror nuk i ka marrë parasysh ankesat e këtyre komunave”, u shpreh tutje Ibrahimi.
I pyetur se a do kërkojnë ndonjë pezullim rreth kësaj çështje, Ibrahimi tha se shpresojnë që Ministria e Financave do ta rishqyrtojë këtë vendim, mirëpo sipas tij, një gjë e tillë do jetë e vështirë.
Teksa më tej, Ibrahimi theksoi se në kohën ku komunat i kanë pranuar dokumentacionet nga niveli qendror, ato e kanë ngritur zërin, mirëpo siç tha ai, zëri i tyre nuk u mor parasysh nga ta./teve1.info/.
