Në mesin e kësaj are me misër në Baicë të Lipjanit, u gjet trupi i Enver Bajraktarit.
59 vjeçari u zbulua një kilometër larg shtëpisë së tij në një gropë që ishte afër 2 metrave e thellë.
Sipas familjarëve, për herë të fundit u pa të dielën rreth orës 16:00.
E krejt dyshimi i zhdukjes nisi kur në shtëpi u kthye lopa që e kishte marrë për kullotje por jo edhe 59 Bajraktari bashkë me të.
Familjari i të ndjerit, Besnik Bajraktari tregon se ky vend u lokalizua pasi në kamerat e sigurisë së shtëpive për-rreth shihet herën e fundit në këtë pjesë.
“Përmes kamerave të shtëpisë së vëllait të tij, lëvizja e fundit që është pa ka qenë afër një shtëpie, pastaj në bazë të asaj janë ardhë e kanë lyp qetu ne teren. Te gjurmët e tij kanë ardhur përmes shtagës që e ruan lopën, pastaj janë pa shenja të ngrehje zhag dhe përmes atyre janë shkua te gjurmët e tij”, ka thënë familjari i Bjaraktarit.
Bajraktari thotë se ishte vështirë gjetja e tij sepse trupi u mbulua me dërrasa, e pastaj u mboll edhe misër mbi dheun në vendin e ngjarjes.
Madje tereni në atë pjesë ishte i vështirë edhe për ecje.
“Përmbi ka qenë misri i mbjelltë, pastaj ka pasur dërrasa dhe kur i kanë heqë ato kanë pas qe u kanë trup i njerit”, është shprehur tutje familjari.
Ai thotë se nuk dinin për ndonjë problem të viktimës.
Për rastin, Policia e Kosovës thanë se janë intervistuar katër dëshmitarë dhe rasti është cilësuar si vrasje e rëndë.
“Në një arë është gjetur i varrosur një trup i pajetë, mashkull rreth moshës 50-60 vjeçare, trupi i cili sipas IML-së është i freskët. Në vendin e ngjarjes kanë dalë edhe prokurori kujdestar bashku me njësinë e zhvarrimit e kanë nxjerr trupit e pajetë, momentalisht nuk dihet identiteti i tij”, kanë thënë nga Policia.
Që po vazhdojnë hetimet kanë thënë edhe nga Prokuroria Themelore në Prishtinë.
“Lidhur me rastin e raportuar të personit të zhdukur në Komunën e Lipjanit se me datë 04.05.2025, është gjetur një trup i pajetë, aktualisht janë duke ndërmarrë veprime hetimore intensive nga ana e Prokurorisë Themelore në Prishtinë në bashkëpunim me policinë e Kosovës, me qëllim të zbardhjes së plot të rrethanave të rastit. Për më shumë informacione ju njoftojmë me kohë”, ka thënë Prokuroria Themelore në Prishtinë
Enver Bajraktari nga fshati Baicë i komunës së Lipjanit fillimisht u raportua si i zhdukur dhe u kërkua ndihmë për gjetjen e tij.
