Kryetari i Degës së Nismës Socialdemokrate në Podujevë, Xhemajl Hasani, ka dhënë dorëheqje nga të gjitha pozitat dhe funksionet që mban brenda partisë, pas grumbullimit të vetëm 192 votave në zgjedhjet e fundit, sipas rezultateve zyrtare të Komisionit Qendror të Zgjedhjeve.
Në një postim në Facebook, Hasani theksoi se ka dhënë maksimumin në shërbim të Nismës dhe qytetarëve, por që puna dhe përkushtimi i tij nuk janë vlerësuar siç duhet nga votuesit. Ai shpjegoi se arsyeja kryesore e dorëheqjes është rezultati zgjedhor, i cili nuk ka arritur pritshmëritë e tij dhe të partisë.
“Arsyeja kryesore e dorëheqjes time është rezultati zgjedhor, i cili nuk arriti pritshmëritë tona dhe të mia personale. Kam dhënë maksimumin tim në shërbim të Nismës dhe qytetarëve, por duket se puna dhe përkushtimi im nuk është vlerësuar në masën e duhur nga votuesit. Në këtë mënyrë, dua të hap rrugë për përforcimin dhe rigjallërimin e strukturave të Nismës, duke liruar pozitën e kryetarit të degës. Faleminderit të gjitha strukturave të Nismës Socialdemokrate për bashkëpunimin dhe përkrahjen gjatë këtij rrugëtimi. Një falënderim i veçantë shkon edhe për kryetarin e Nismës, z. Fatmir Limaj, për mbështetjen dhe udhëheqjen e tij. Ju uroj suksese të mëtejshme Nismës dhe të gjithë kolegëve në përpjekjet për të kontribuar në zhvillimin e vendit tonë,” ka shkruar Hasani.
Në zgjedhjet lokale të Podujevës, Shpejtim Bulliqi nga Lëvizja Vetëvendosje (VV) ka arritur një rezultat të shkëlqyer, duke marrë 20,407 vota. Ai ka lënë pas kandidatin e Lidhjes Demokratike të Kosovës (LDK), Ekrem Hysenin, i cili ka grumbulluar 14,932 vota.
