Në gjykimin për rastin e sekuestrimit të 400 kilogramëve kokainë, në Gjykatën Themelore në Prishtinë, të enjten dha mbrojtjen i akuzuari Fehmi Bytyqi, i cili deklaroi se dita kritike ishte si gjithë të tjerat dhe nuk kishte asgjë ndryshe.
Në rastin e 400 kilogramëve kokainë të ardhur nga Brazili, po akuzohen pronari i kompanisë “MC FOOD”, Izet Sheqiri, dhe katër të tjerë: Faton Vrajolli, Kadri Sheqiri, Kadri Brahimi, Fehmi Bytyqi.
Fillimisht, kryetari i trupit gjykues, Ngadhnjim Arrni njoftoi se është ndërruar përbërja e trupit gjykues, me arsyetimin se anëtari i trupit gjykues Valon Kurtaj është avnacuar në Gjykatën e Apelit, ndërsa do të zëvendësohet me gjyqtarin Lutfi Shala.
I akuzuari Bytyqi deklaroi se procedurat doganore nga momenti kur kishte marrë mallin në Portin e Durrësit dhe kontrollet në Agjencinë e Ushqimit dhe Veterinarisë (AUV), marrin një kohë afërsisht tetë apo nëntë orë, ndërsa theksoi se nuk kishte asgjë ndryshe nga procedurat që ndiqte çdo herë ose të ketë marrë ndonjë udhëzim.
“As nuk kam ndryshu, as s’kam marrë udhëzim tjetër, ka qenë ditë e zakonshme”, tha i akuzuari Bytyqi.
Lidhur me proceduren e incizimit të mallit, i akuzuari Bytytqi tha se aty ishin prezent zyrtarë doganorë, shpeditor dhe shoferë.
“Personat zyrtarë të Doganës, shpeditera dhe shoferë aty”, tha Bytyqi.
Në aktakuzën e Prokurorisë Speciale të Republikës së Kosovës (PSRK), për rastin e sekuestrimit të 400 kilogramëve kokainë, të akuzuar janë pronari i kompanisë “MC FOOD”, Izet Sheqiri, dhe gjashtë të tjerë, Faton Vrajolli, Kadri Sheqiri, Kadri Brahimi, Fehmi Bytyqi, Hyzri Sheqiri dhe Naim Morina.
Ndryshe, bashkë me pesë të akuzuarit, në këtë rast akuzoheshin edhe Hyzri Sheqiri dhe Naim Morina, por pas arritjes së marrëveshjes për pranimin e fajësisë çështja penale ndaj tyre ishte veçuar.
I akuzuari Hyzri Sheqiri pas arritjes së marrëveshjes për pranim fajësie me Prokurorinë, është dënuar me 7 muaj burgim efektiv për pengim të procedurës penale.
Kurse, i akuzuari Naim Morina pas arritjes së marrëveshjes për pranim fajësie, është dënuar me 6 muaj burgim efektiv për pengim të procedurës penale.
Në këtë aktakuzë, Prokuroria ka propozuar të konfiskohen 400 kilogramë kokainë, makina, armë e rreth 26 mijë eurove.
