Ai ka ardhur të vizitojë babanë e tij të shtrirë në spitalin e Mitrovicës.
Dhomat e Specializuara kanë deklaruar se lejimi i tij që të vijë në Kosovë nga paraburgimi, ku ndodhet, është bërë për arsye humanitare.
Në orën 9:00 ishte paralajmëruar se Gucati do të vizitonte sot babanë e tij në spital, por siç njofton gazetarja e RTK-së, ai ende nuk ka shkuar.
Gucati po qëndron në Kosovë nën përcjelljen e rreptë të policisë së EULEX-it dhe përveç familjes së ngushtë të cilët i takoi të enjten vetëm për dy orë në shtëpi, natën e ka kaluar në një objekt të EULEX-it në Prishtinë.
Kryetari i OVL të UÇK-së, bazuar në informacionet e siguruara nga RTKlive, do të qëndrojë në Kosovë deri të dielën.
Ndërkohë, të mërkurën pritet që të shpallet aktgjykimi ndaj tij dhe Nasim Haradinajt, të cilët akuzohen për shpërndarjen e dokumenteve konfidenciale të prokurorisë.
Në vjeshtën e vitit 2020, një person i pa identifikuar ka dorëzuar në selinë e OVL të UCK-së, dokumente të cilat më vonë vetë Dhomat e Specializuara konfirmuan se janë të tyre.
Edhe më tej prokuroria nuk ka dhënë shpjegime se si i kanë rrjedhur ato dosje.
